अथांग नेत्रांची

आगामी कवितासंग्रहातून...

नाही, नाही पुन्हा जायचं, असंच
हुरहुर हृदयाची
नको पुन्हा करुन देऊस जाणीव
वाट पाहत्या मनाची

नको, नको अशी दिसू नकोस
‘तेंह्वा शेवटची’
नको पुन्हा होऊस अशी
हृदयचित्रांची

दिसत जा... रोज रोज
येताना, जाताना
तू ग तुझीच राहून
माझीही होताना

नको, नको पुन्हा दिसू नकोस
शोधत्या श्वासाची
नको पुन्हा होऊस, अशी या
हळव्या मनाची

हसत जा, लाजत जा... रोज
काही बोलत जा
उद्या येणार आहेस म्हणून
अशीच तू पहात जा

नाही, नाही पुन्हा लाजायचं
कोमल पावसाची
नको पुन्हा पाहूस अशी
अथांग नेत्रांची

रोहन जगताप

मूर्ख मन

मूर्ख मन

मी आणि माझं एक मूर्ख मन
दोघेच आहोत इथं, एकांत कट्यावर
तासंतास तुझा विचार करत
इथल्या काळोखातून, सर्वदूर ता-यांमध्ये

कुठेतरी असशील तू
आणि काहीतरी करत असशील
तुझ्याच कल्पनाविश्वात रमून
जिथे अनंत प्रकाशवर्षांपर्यंत
मी कुठेच नाही

पण माझ्या कल्पनाविश्वाचे प्रतिबिंब
उमटले आहे या समोरील ख-या आवकाशात
जिथे या क्षणी तूच तू एक आहेस

तो सुदूर तारा किती जवळ माझ्या!!!
आणि माझे घर दूर दूरऽऽऽ

रोहन जगताप