त्याच्या आयुष्याला तरी

काही ओळी तुझ्यासाठी लिहीलेल्या
काळाच्या ओघात दूर दूर गेलेल्या
आता माझ्या मनात अशाच आल्या
आणि मला त्या तिथे घेऊन गेल्या

हं... पण मी तेंव्हाच होतं जाणलं
म्हणूनच एकांतात,
छोट्याशा कागदावर लिहिलं...

‘भरकटेल तो अवखळ वा-यामध्ये अडकून
उंच उंच माझ्या हातातून
माझ्या जीवनावरून’

जसा एखादा संदेश घेऊन
सोडलेला बलून
रहावी माझी आठवण
मलाच म्हणून

कधी वाटतं मला माझ्या मनाशीच
वा-याने न्यायला हवं होतं त्याला
फक्त एकदाच बोलण्यासाठी तुझ्याशी

अर्थहीन आयुष्यातील
असला तो कागद जरी
हवा होता अर्थ त्याला
त्याच्या आयुष्याला तरी

- रोहन जगताप