तू सहजच

तू सहजच बोलून जातेस
तू सहजच हसून जातेस
दुस-या दिवसाची प्रतिक्षा
मात्र मलाच लागून राहते

धडधड या हृदयाची
थांबता थांबत नाही
तुझ्यासाठी जगण्यासाठी
मी थांबवतही नाही

कधी नकळत फुलांमधूनी
भ्रमर बनून जाताना
हा हवेत दरवळणारा
मन सुगंध झेलताना

वाटे सुंदर जीवन आहे
आपुल्याही वाटेवरूनी
की क्षणात निघूनी जाते
ती ही वाट सरुनी

तू सहजच बोलून जातेस
तू सहजच हसून जातेस
नी या मनवेड्याला प्रतिक्षा
कशाची लागून राहते?

-रोहन जगताप